Il corso di yoga

E niente.. go comincià un corso de yoga…ale 6 e mezza de matina….

Quindi   ogni mercoledì me svejo ale 6 meno un quarto – che me fa meno impression che non scriver “me svejo  ale 5 e 45” –  ma sempre quel xe …

Co verzo i oci e vedo che ora che xe, emergi subito in tutto el mio essere  una sensazion intensa  de serenità e de felicità che se pol riassumer con …. “Remengo mi con tutto el yoga”

E me giro subito del’altra parte

Ma .. DREK !!! .. me ricordo che go pagà el mese anticipado e lora le mie radici istriane me sburta subito subito zo del leto..

Casco dal stramazzo, ma me rialzo subito …perchè fazo yoga

Vado subito in cuzina perchè me go imparado che el corpo pena svejo ga bisogno de idratazion .. . e quindi me bevo mezzo litro .. ma de acqua …perchè fazo yoga..

Me vesto .. ecco .. gavè presente le modelle coi super fisici e i super vestiti che vedè per television?

Tutto altro … maja larga che no me se vedi le mulze e un per de braghe che usava mio papà – pace all’anima sua – co ‘ndava zapar in orto

Bon .. niente .. vado fora de casa .. me inciampo sul ultimo gradin dela scala e finisso per terra vizin del porton .. ma el tutto con estrema flessibiiltà ..perchè fazo yoga

Fora xe scuro .. me vien quasi de pianzer … ma vado oltre questi sentimenti cussì terra terra … perchè fazo yoga

Via in auto .. rivo là.. e se comincia …

E l’insegnante ne dizi subito  una frase sai bela ….

Lo yoga ci porta nel momento presente, facendoci diventare coscienti della nostra postura, dei nostri movimenti,  della nostra respirazione e dei nostri pensieri

Che bel ara ciò, comincio subito subito sperar che me nassi un milion e mezzo de pensieri, cussì rivo esser cosciente proprio de tutti e infatti .. eccoli…..

• Me spuza i scai
• I penserà che no me lavo dal teremoto del 1976
• Go una fame nera
• Podevo almeno magnar un pomo
• Podevo almeno magnar un panin de porzina
• Cascherò per terra da tutta sta fame
• Veramente son za per terra.. bon … al limite cascherò  dal tapedin ..

Ma me elevo subito da sti pensieri cussì terra terra … perchè fazo yoga

Ma .. chissà .. forsi no xe tutto perso … perchè l’insegnante a un certo momento ne fa star in equilibrio e per zercar de no cascar per terra e far brutta figura, allora me concentro .. e all’improvviso me sparissi tutti i pensieri .. son concentrada solo sul momento presente, no esisti piu’ gnente altro .. solo mi .. e la presenza totale del mio corpo …

Iero talmente emozionada che me xe aumentada la spuza soto i scai..

Alla prossima !