E ora .. mi presento…
Chi son? Son single.. no, no xe un annuncio matrimoniale.. xe che xe proprio cussì, poderia dir zitela… ma fa tanto signorina acida anni 20 e mi inveze son signorina ranzida anni 2000 e rotti…
Me ocupo de mia mama (la Vecia) che ga 90 anni e ga circa 854 patologie ma no la molla mai e xe sempre che la neta la polvere ogni volta che la porto de qualche parte … l’ultima volta che ierimo al Maggiore (l’ospedal) la gaveva cominciado ‘diritura a netar la polvere soto la barella …
Cossa me piazi? Me piazi sai far ginnastica all’aperto anche co xe freddo .. bon no proprio quando che xe bora a 180 gradi se no svolo mi e anche la mia nova tuta de ginnastica..
Dopo me piazi el teatro, me missio sempre con compagnie teatrali de qua e de là, … xe sai bel el teatro savè? Te permetti de esser un altra rimanendo comunque sempre ti stessa e forsi te permeti anche de ampliar ti stessa..Me piazi sai scriver co son triste, ma anche cussì .. semplicemente co go voja de dir qualcossa … la scrittura te ‘iuta a veder le robe in modo diverso, te ‘iuta ad allontanarte da cossa xe nato e contemporaneamente a capir un poco de più come che sta andando la tua vita …
Dopo me piazi anche magnar un piatto de capuzi co le luganighe .. ma bon… questa xe un’altra storia !