San Donà di Piave…terza e ultima puntata
…Nel frattempo google maps me continuava a suggerir dove che dovevo ‘ndar e mi lo scoltavo sai ubidiente, ma a un certo punto sula destra vedo che sbuca una ciesa e lora go subito deciso de ‘ndar verso sta ciesa e de mandar in mona google maps
Rivo là de sta ciesa che xe sai cocola, la xe fata in tre tochi, la prima parte xe come la ciesa de Sant’Antonio novo a Trieste, de drio xe una parte più alta in t’un altro color e vizin xe el campanile che xe veramente sai longo e xe sempre del stesso color dela parte più alta
Desso però mi prego tanto Gesù Bambin e tuta la Sua santa combricola, che nissun architetto o storico o guida turistica leggi la mia descrizion dela ciesa, perché se no i se se buta tuti zo del pergolo, o forsi xe sai più probabile che zo del pergolo i me buta a mi…
Go fato le foto dela ciesa davanti e dedrio, de parte inveze no perché me go dimenticado
Dopo de ste foto, de gaver girado in tondo ala ciesa, de gaver pregado el Padre Nostro perché xe sempre bel pregar, decido che iera ora de tornar casa perché me gavevo un fiatin roto le bale
No impizo de novo google maps perché tra de mi me digo “Che monade Rita, te se volti e te torni indrio, coss te servi google maps?”
E cussì torno indrio disinvolta come quando da via Carducci vado in piazza Goldoni per ciapar la cinque, pecà solo che per vardar una villa piena de rovi e trasandada proprio come mi quando che vado butar le scovaze, me go perso e no savevo più dove che iero
“E desso??? Cossa fazzo?? A chi ghe domando dove che son? Ai rovi dela villa?”
Ma improvisamente vedo una sioreta dal’altra parte della strada e lora ghe coro drio – ma con educazion – e ghe domando dove che xe ‘ndada finir la stazion dei treni – .. e iero solo che a San Donà di Piave
Ve immaginè se iero a Caltanissetta????
Alla prossima!
0 commenti