Viaggi

Eh niente.. dopo quel meraviglioso vasetto che go piturado l’altra domenica, oggi go fato un’altra roba nova

Go deciso che gavessi ciapado el treno e che gavessi passado un pomeriggio in una città cussì, a caso.

Volevo zercar el treno per Caltanissetta ma sicome volevo anche tornar a casa per zena allora go ripiegado su San Donà di Piave/Jesolo che me pareva una sana via de mezzo tra Monfalcon e Caltanissetta che gnanca no so con quante esse che se scrivi sta città

Rivo a San Donà … pensavo de trovar tre case, una piazza e una ciesa.. “forsi le sarà” penso tra de mi “ma me sa che le sarà sai sai lontan”.. perché co son scesa dala stazion iera una desolazion che manco co sera per ferie Mirella xe compagna tristezza

Me vardo in giro zercando de ‘sconder el più possibile el mio pensiero fisso che se podeva riassumer con “Ma cossa c..o son vignuda far qua, no iera mejo pitosto che me ‘ndavo confessar dal prete de Rojan che no lo vedo dal 1999?” E infatti nel frattempo xe morto…

Vedo a destra un tabachin e lora decido che ‘ndarò domandar un biglieto per l’autobus che con sta domanda no se sbaglia mai, ma la sioretta me frega subito e la me chiedi : “Per dove il biglietto?”

“Remengo tuo” penso tra mi e mi, “e cossa so mi dove che vojo ‘ndar, so a malapena dove che son rivada!!” . ma no volevo far proprio subito subito la figura de mona, e lora ghe go dito una città che sicuro stava la vizin … “il biglieto lo vojo per Caltanissetta” ..

Ma no dai che scherzo!! Ghe go dito che volevo el biglieto per Noventa, cussì desso no go gnanca un biglietto per i bus de Trieste ma go un biglietto per Noventa andata e ritorno

Che me ga costado tre euro…

Continua…

Alla prossima!