Ah l’amore !

Eh niente, gavessi come una domanda….

Ma come diavolo fa certiduni a lassarse col moroso/morosa e dopo gnanca una settimana te li vedi in giro e I te dizi: “Ciao cara, ti presento il mio nuovo compagno/a”???

Ma me dizè dove tegnivi sconti sti nuovi compagni? In qualche vecia soffita del Partito Comunista?

O siccome se iscritti a Prime, li ordinè diretamente su Amazon cussì I ve ve riva dopo un giorno?

Ve prego dizeme el vostro segreto che l’ultima volta che me go inamorà xe stado de un agente immobiliare che go visto penso 32 minuti e mezo, lui me parlava del catasto e mi ghe fazevo si con la testa ma dentro de mi ghe misuravo quanto iera grande el suo torace che, a ocio, ghe podeva star sora sia Rose che anche quel mona de Jack del Titanic.

Ma lui no sa niente de tuto sto mio remitur, no non quel mona de Jack del Titanic, ma sto agente immobiliare che quando che xe ‘ndado via me se ga un pochetin strento el cuor (ma penso perchè gavevo el regipeto che usavo quando che gavevo trenta anni, e quela volta ghe ne gavevo quarantanove e mezzo)

Dove vado per inamorarme che desso anche se vado butar zo le scovaze devo gaver l’autocertificazion??

Che ocasioni de incontro maschile go???

• El putel che porta a casa I panoloni per mia mama … ma l’ultimo putel iera ranzido come un yoghurt ‘ndado de mal e po’, a mi I pannoloni no xe che proprio me stimola el romanticismo..
• Doman dopopranzo vado in bus .. podessi farghe le bele all’autista ma xe quela maledeta cadenela che I ga meso tra l’autista e el popolo che ne separa ancora prima de conosserse….
• Quindi saria una storia travagliata ancora prima de iniziar, quasi come uno dei dramoni de Shakespeare o come una telenovela tipo “Il segreto” de Rete4…
• E la mia podessi esser “El segreto de come scavalcar la cadenela”
• Oppur “Scavalca la cadenela e trova la felicità”

Ma mi no scavalco gnente perchè me fa mal la schiena, e go deciso che:

Li frego tutti, doman me porto una manera sula 5 e rompo la cadenela

Sicuramente la manera me starà in borsetta!

Alla prossima!