Eh niente.. purtroppo xe el Corona Virus…

Bisogna star in casa... come passo le mie giornate… varie possibilità de scelta :

  1. Scoltar i due cani dela famiglia che sta sora de mi, che i cori su e zo per el coridoio (i cani, non la famiglia) e pensar che podaria far la stessa roba anche mi, però senza abbaiar.
  2. Zercar de convincer mia mama (“la Vecia”) che mi son sua fia e no una sua cugina de quando che la iera picia
  3. Uscir stremada dal punto due e ndarse riposar per una mezz’oretta
  4. Pensar che podessi netar la polvere
  5. Pensar che anche se resta la polvere nissun pol vignir in casa a controlar
  6. Esultar dieci minuti e mezo per el punto 5
  7. Pensar a quanto manca per la fine dela zornada
  8. Sconder le scovaze perchè no se pol ndar fora de casa
  9. Pensar a dove ‘sconderle
  10. Sconderle in pergolo
  11. Pensar che se vien bora son ciavada perchè le svolassi via e faria solo che bruta figura
  12. Sconderle soto la sedia che xe in pergolo
  13. Pregar mia mama de star attenta perchè se la casca per tera in sto periodo pol vignir solo che Capitan Harlock a tirarla su
  14. Sentirghe dir “ara che no son mai cascada
  15. Elencarghe le volte che xe sucesso
  16. Andarse riposar per una mezz’oretta dopo el punto 15
  17. Pensar a quanto manca per la fine dela zornada
  18. Pianzer 5 minuti dopo el punto 17
  19. Ricordarse che fora xe gente che mori e el personale dei ospedai xe distrutto
  20. Pregar per quanto scrito al punto 19 e applaudir el personale che lavora nei ospedai (e in generale tuti quei che ga de ndar lavorar) anche senza ‘ndar in pergolo
  21. Ringraziar perchè che el mio compito xe solo quel de star casa

Alla prossima!


0 commenti

Lascia un commento

Il tuo indirizzo email non sarà pubblicato. I campi obbligatori sono contrassegnati *