Eh niente… sto dicembre no vol proprio passar !
Stanote go fato un sogno… ierimo in maggio e me gavevo pena fato i pei perchè volevo ‘ndar al Pedocin e no volevo far bruta figura, volevo ‘ndar a far la Bavisela ma dopo go deciso de no perchè me gavevo rabiado, vedevo tutto nero e qualchedun in alto che voleva scancelar el nero perchè dizeva che iera bruto, e tutti che zigava che no iera giusto…
Me go svejà tuta sudada de sto casin, ma tuto sto sudor se ga subito trasformado in stalattiti che gnanca in tuta la Grota Gigante ghe ne xe compagne
Vardo fora dela finestra e me inacorzo che xe una bora che faria sicuro svolar scovaze e scovazini insieme… meno mal che i bidoni xe incadenai e i scovazini i se riposa
Impizo i caloriferi … ma no i funziona …. e nela mia mente fazo za barufa con l’aministratrice che la se ga permesso de serar i caloriferi proprio desso che semo in dicembre …. ma per “no saver né leger né scriver” verzo el casseto e me meto subito subito la maja de lana che me ga ciolto mia mama nel 1985 per el corredo … pecà che se passai oltre trenta anni e de mari’ gnanca l’ombra.. in compenso me xe rimasta la maja de lana, 35 majete de coton, 32 de lana, 27 ‘sugamani e circa 40 linzioi matrimonali …
Dopo questa panoramica del’armeron me decido .. metero’ tuto in vendita su subito e me comprerò un termosifon de 12 metri e mezo per 94
Sarò l’invidia de tutto el condominio…
Alla prossima !
0 commenti