Eh niente… vado far ginnastica a San Giusto
Vado con un allenador che se ciama Diego, che xe sai bravo e cocolo, e visto che fazo una fadiga dela madona te se immagini se iera anche antipatico????
Lui xe napoletan ma mi ghe parlo in triestin e lui se diverti .. ogni tanto ghe imparo come che se dizi i nostri termini più forbiti, tipo “remengo tuo, va in m…, opur Pedocin)
Lui me parla spesso ma mi ghe rispondo a moti, perchè dopo el primo giro de corsa e de ‘ndar su e zo dele panchine go za la lingua fin fora, che da San Giusto la me va finir a Rojan e me toca rodolarla con l’elastico dele mudande
Ma son sai contenta perchè co me alleno le mie preoccupazioni finissi sul sfondo dela mia vita, e co finisso de far ginastica me par come de gaver più energie per affrontar tutto quanto, e questo me rendi sai contenta, e mi co son contenta me vien subito voja de ‘ndar a magnar una luganiga de cragno de Bepi ‘Sciavo.
Ma no vado
Co son su vedo sempre una vecieta che la vien là, la se senta su una dele panchine, la se meti un fazoleto sui zenoci perchè la ga osteoporosi, (no go ben capido cossa che c’entra ma el fazoleto xe sai bel) la legi un giornaleto e la parla coi gabiani
Oltre che i gabiani la parla anche con noi e la xe proprio sai cocola, perchè no la ga perso el suo morbin e la sua forza anche se la ga avudo una vita che Maria de Filippi podessi farghe su trentadue puntate e mezzo de “C’è posta per te”
Ma no la le fa.
Ma mi no me interessa perchè per mi l’esempio dela vecieta xe sai importante… e tutto xe nato da una sua confidenza, quindi penso che aprirse un poco ai altri pol esser sai utile, se pol ‘iutar qualchedun anche senza saver.
Senza ‘ndar de Maria de Filippi
Alla prossima!
0 commenti