Ciau Mahmood,
scolta… go leto che da sabato note (praticamente domenica) a ieri, che ierimo lunedì, xe tuti che scrivi come mati robe contro de ti
Perchè??? Perchè te ga vinto Sanremo??? Perchè altri meritava più de ti? Perchè te son foresto???
Ma cossa …xe forsi colpa tua? No me par ecco… quindi… scoltime mi … stampa le robe brute che i te ga scritto, ciol tuta quela carta e portitela in gabineto … e dopo fa ti, no xe che mi te go proprio de dir tutto.
Ti te ga vinto Sanremo e solo che questa xe la roba più importante!!
Desso te ga de continuar a studiar, a cantar, a diventar migliore, e a usar quel che de bel te sta dando la vita per ‘iutar i altri
Magari anche per migliorar un poco la tua de vita, perchè scoltar la tua canzon me ga fato capir che tanto ben no te se la ga passada, e me dispiazi per ti, anche se no te go mai visto girar per Rojan.
Te speto comunque a Rojan co te gaverà voja, te me ciami e te vegno cior al capolinea dela 8
Te devo proprio dir la verità .. mi me ga piasso la tua canzon, ma anche mi son fra quele che gaveva altri gusti … qua fazo outing.. mi me piazeva sai la canzon dela Bertè
Scolta ma forsi ti te sa… cossa gaveva la Bertè nela sua borsettina, che nela prima puntata la se la tegniva strenta proprio come che mi me tegno strenti i miei ragi dela tiroide??
Ma soprattutto .. secondo ti come la fa a girar con una borsettina de cinque centimetri per due e mezzo, co mi go una borsetta che pesa cinque chili meno quattro etti???
Bon, scusime, desso me go perso, te devo confessar che mi, più che la tua canzon, me piazeva la canzon de Ultimo che se ga tanto ‘rabiado che no xe vignudo lui primo, e questo me ga fato sai dispiazer perchè penso che ai vostri liveli dovessi complimentarse a vicenda e no mandarve remengo… no so .. cussì penso mi
Proprio come che se ga complimentado con ti el putel del trio “Il Volo” … ecco … scusa che te digo … continuando el mio outing… più de ti, oltre che la Bertè e Ultimo, me ga sai piasso sti tre putei, so che i xe classici, ma me piazi le robe de una volta, coss te vol far, ognidun ga le sue.. ecco.
Infati me piazeva sai el putel che ga cantado del nonno che xe morto e ‘scoltandolo, go pianto circa 25 minuti e mezo .. un poco come quando vado in agenzia dele Entrate ecco.. solo che scoltando la sua canzon pianzer iera più bel…
Go pianto anche tanto co la canzon de Cristicchi, ma xe cussì caro Mahmood, coss te vol far!
Se proprio te vol che te la digo tutta, go anche pianto tanto co Bisio e la Raffaele ga fato quela sotospecie de parodia de “Ci vuole un fiore”… e ciò .. te se imagini coss che gaverà pianto Sergio Endrigo ‘scoltandoli?????
Eh bon, scolta picio, desso go de ‘ndar, ancora tanti auguri per el tuo futuro, freghite dele polemiche, studia, migliorite, magna robe bone e sane, ‘iuta i altri e no sta ciapar fredo
Ah si, che no me dimentico .. con i soldi che te guadagnerà .. te prego come Iddio, comprite un’altra camizeta e te racomando de usar che te gavevi co te ga vinto, solo per netar la polvere!!
Tuta l’Italia te ringrazierà
Ciau bel
Alla prossima!
0 commenti