Biancaneve riveduta e corretta seconda puntata

Nel frattempo la nostra Biancaneve la ga trovado rifugio in t’una caseta picia con 7 bambineti pici e con 7 detersivi normali

Sti pici (i bambineti e no i detersivi) i se gaveva afezionado a ela e ela a lori, i cantava sempre come zurli ma no gaveva importanza per Biancaneve che la iera contenta perchè sicome in casa iera tuto picio ela la finiva de netar tuti i mobili e anche el gabineto in 13 secondi e mezo

Intanto quela crodiga de Grimilde che la voleva tornar a esser ela la più bela de tuti, la decidi de trovar Biancaneve per trasformarla, come che se dizeva ieri, in t’una straza de lavar per tera

Allora, la invelena due pomi codogni con la polvere del pergolo, la verzi una chat su whatsapp per zercar Biancaneve, ste chat funziona sempre quando che no le dovessi, infati la trova la casa dei 7 pici e purtropo anche Biancaneve

Travestida da vendirigola, la ghe conza sti pomi invelenai dizendo che i xe biologici, Biancaneve che gaveva una fame nera la se li magna, la casca per tera e là la resta.

Grimilde tuta contenta la scampa via ma la sbrissa su uno dei due pomi invelenai finendo per trasformarse in ludame per i manzi

A domani per la terza puntata !

“Biancaneve” …riveduta e corretta prima puntata

Eh niente.. purtroppo xe el Corona Virus…

Bisogna star in casa…

Per distrarci, ecco a voi “Biancaneve” in versione riveduta e corretta

Ghe iera una volta una picia a cui ghe iera mancada la mama e la iera cressuda con una matrigna

Sta matrigna, inveze che iutar sta povera picia, la preferiva passar tuto el giorno davanti al specio a domandarghe come una zurla::

Specio mio specio

se ti me dizi de no mi te spudo in t’un orecio

la più bela col cafè coretto

son sempre mi e solo che mi, dime de si !

El specio povereto, se gaveva roto i bizi a sentir ogni giorno sta loica, ma sicome ghe tegniva al suo orecio no ghe podeva dir ala matrigna che la iera una crodiga, e lora ghe rispondeva più o meno cussì :

Grimilde si, la più bela te son solo ti

‘dio

Ma giorno dopo giorno, la picia cresseva e la diventava bela brava e cocola e la matrigna tuto questo ghe rozigava dentro, finchè un giorno ala sua classica domanda, el specio ghe rispondi cussì :

Biancaneve xe bela

ti inveze te son proprio una crodiga

‘dio

e el se trasforma in t’una straza de piati

La matrigna la xe diventada verde de invidia proprio come la salata che xe nei orti de de Capodistria, la ciama el suo cacciator de fiducia e la ghe dizi “Te ga presente Biancaneve?? Eco, copila e trasformila in t’una straza per lavar per tera”

El cacciator ga una paura beca de sta crodiga de Grimilde, ma ga un contratto a tempo indeterminato e lora ghe toca obedir ai ordini

El trova Biancaneve ma no ghe la fa, ghe dizi tuta la verità e grazie a lui la mula riva a scampar, ma el caciator devi tornar de Grimilde e lora va in supercoop a comprar una straza per lavar per tera, torna de Grimilde e ghe dizi “Ciapa, te go portado Biancaneve”

Ma Grimilde no ghe credi e lo trasforma in t’un detersivo per i piatti

A domani per la seconda puntata!