Quesiti esistenziali…

Ma desso che go el blog… come fazo a farme vignir ogni giorno un’ispirazion a scriver qualcossa?

Lassemo star che go el blog da due anni, e me fazo sta domanda pena desso… ma xe che el tempo per mi xe sempre stado un dettaglio…

Come fazo a impizar el computer e dai budei farme vignir un’ideona che gnanca la baba che ga scrito Harry Potter ghe xe mai vignuda?

Bon desso forsi esagero, senza scomodar dirittura Gei Chei. oddio come xe che la se ciama?? Bon dei, Gei Chei quela là, me bastassi che me vignissi le idee che ga la baba soto de mi , che ogni do giorni la compra un fior novo da meter in pergolo, e la cambia la disposizion dei fiori come mi cambio i sugamani in gabineto

Ieri ghe li go contai (i sui fiori no i mii sugamani) le ga 12 gerani, do ulivi, 40 orchidee, 3 fiori rossi, 44 piante bianche in fila col sei col resto di due…… e un pergolo in cui podessimo balarghe el tango in dodici

Ma no se bala nel suo pergolo … uno perché mi go finido le mascherine … e due … el tango mi … no lo so proprio balar

No so balar gnanca el walzer se xe per quel, e gnanca la mazurca (né quela de periferia né quela che xe su per le alte)

E la polca??

Lassemo star

Anni de sagre in giro per l’Istria con che risultato?

Son dura come la scova che xe in supermercato de Capostria.

Chissà se esisti un “Ballando con le stelle” per la gente comune? Quela gente che xe un poco dureta per moverse….

I lo podessi intitolar “Ballando con le scove de Capodistria”

Me iscriveria doman

Alla prossima !